भिडियो हेर्न यहाँ तल क्लिक गर्नुहोस
 |
व्यवस्थापन समिति तथा सरोकारवालाको चरम लापरबाहीका कारण गङ्गोलिया गाविस–२ पिपरहियामा रहेको पाँच शय्याको स्वास्थ्य उपचार केन्द्र दुई वर्षदेखि सेवाविहीन भएको स्थानीयवासीको आरोप छ ।
स्थापनासँगैको केही वर्ष सामान्य शल्यक्रियासहितको सेवा प्रदान गर्नुका साथै समयसमयमा चिकत्सकद्वारा स्वास्थ्य शिविरसमेत सञ्चालन गर्ने स्वास्थ्य केन्द्र यतिबेला भने आफै थला परेको बिरामीसरह भएको छ ।
स्वास्थ्यको पहुँचबाट टाढा रहेका रुपन्देहीका पूर्वी तथा दक्षिणी ग्रामीण भेगका गङ्गोलिया, हाटी फर्साटिकर, पड्सरी (हाल तिलोत्तमा नगरपालिकाअन्तर्गत)का साबिक मधौलिया र मक्रहर गरी आधा दर्जनभन्दा बढी गाविसका गरिब तथा असहायलाई लक्षित गरी सञ्चालनमा ल्याइएको स्वास्थ्य केन्द्र अलपत्र अवस्थामा पुगेको हो ।
उपचारका लागि दैनिकजसो बिरामीको भीडभाड लाग्ने स्वास्थ्य केन्द्र अहिले सुनसान देखिन्छ । पाँच बिघा क्षेत्रफलमा फैलिएको केन्द्रको परिसर स्थानीयका लागि पिकनिक स्पट तथा गौचरनका रूपमा प्रयोग हुँदै आएको छ ।
स्वास्थ्य केन्द्रबाट सरल र सहज रूपमा लाभान्वित हुँदै आएका सर्वसाधारण सेवाविहीन हुँदा सामान्य उपचारका लागिसमेत टाढाटाढा धाउनुपर्ने बाध्यता भएपछि प्रत्यक्ष मर्कामा परेका छन् । लाखौँको लागतमा निर्मित भवन उपयोगहीन भएको छ भने प्रयोगशालामा रहेको अल्ट्रासाउन्ड, अटो क्ल्याप, मोनिटर, इएनटी सेट, बिपी सेट, स्टेथेस्कोप, नेबोलाइजर, इसिजी मेसिन लगायतका लाखौँ मूल्य पर्ने अत्याधुनिक स्वास्थ्य परीक्षणका सामग्रीसमेत प्रयोगहीन अवस्थामा थन्किएको छ ।
घरदैलोमै रहेको स्वास्थ्य केन्द्र सेवाविहीन हुँदा आफूहरूलाई सामान्य उपचारमा समेत समस्या पर्ने गरेकाले स्वास्थ्य केन्द्र सञ्चालनका लागि अब स्थानीयस्तरबाटै पहल गरिने स्थानीय पोषकान्त बस्यालले बताए ।
तत्कालीन योजनाअनुसार स्वास्थ्य उपचार केन्द्रसँगै मल बीउबिजन केन्द्र, सञ्चार केन्द्र, खानेपानी तथा सरसफाइको व्यवस्था लगायतका विभिन्न सामाजिक उद्देश्यसहित सञ्चालनमा ल्याउने भनिएको केन्द्र अहिले भने सेवाविहीनमै सीमित भएको छ ।
स्थानीयस्तरमै पर्याप्त भौतिक संरचना तथा स्वास्थ्य परीक्षण सामग्रीसहित स्थापना भएको स्वास्थ्य केन्द्र सञ्चालनका लागि सम्बन्धित निकायको ध्यान पुग्न जरुरी छ । रासस
Source News feed from स्वास्थ्य खबर पत्रिका http://ift.tt/1Cjv0eP
Posted via IFTTT
भिडियो हेर्न यहाँ तल क्लिक गर्नुहोस
|
|
